Миллатлараро ўзаро тотувлик, аҳиллик ва иноқлик умумбашарий қадрият бўлиб, турли хил халқлар биргаликда истиқомат қиладиган минтақа ва давлатлар миллий тараққиётини белгилайди, шу жойда тинчлик ва барқарорликнинг кафолати бўлиб хизмат қилади.
Мустақиллик йилларида Ўзбекистонда миллатлараро муносабатлар яхшиланиб боришининг асосини қуйидагилар ташкил этади:
— миллатларнинг ўзаро тенг ҳуқуқлилиги;
— миллатлараро ҳамкорлик;
— миллий-маънавий маърифий тараққиёт;
— миллий-маънавий, маданий хусусиятларни ҳисобга олиш;
— турли халқлар ва миллатлар маданиятининг ривожланиши;
— барча миллатларга ҳурмат билан қараш;
— миллий ва умумбашарий қадриятларнинг уйғунлиги;
— миллий ўз-ўзини англашни кучайтириш;
— миллий ғурур, миллий фахрни шакллантириш1.
Ўзбекистон сингари полиэтник мамлакатда турли миллатлар манфаатларини уйғунлаштириш, улар орасида тотувликнинг бири ҳисобланади. Ҳар бир миллатнинг истиқболи бошқа халқлар ва мамлакатларнинг тараққиёти бутун жаҳондаги вазият ва имкониятлар билан ҳам боғлиқдир.
Шу билан бирга мамлакат доирасида миллий манфаатларни тенг қондириш, улар ривожини таъминлаш мураккаб масала эканини англамоғимиз лозим.
Миллатлараро тотувлик бир жамиятда яшаб, ягона мақсад йўлида меҳнат қилаётган турли миллат ва элатларга мансуб кишилар ўртасидаги ўзаро ҳурмат, дўстлик ва ҳамжиҳатликнинг маънавий асосидир.
Мустақиллигимизнинг илк йиллариданоқ мамлакатимизда демократик, ҳуқуқий давлат ва фуқаролик жамиятини барпо этишга катта эътибор қаратилмоқда.
Демократик жамият қуришнинг энг асосий тамойилларидан бири бошқа миллат вакилларини камситмаслик, уларга нисбатан тенглик муносабатида бўлишдир.
Ҳудудимизда кўпчиликни ташкил этган ўзбеклар ва бошқа миллат вакилларининг ўзаро муносабатини мустаҳкамлаш ва уларнинг ҳамкорлигини сиёсатлашган мафкура деб эмас, аксинча маънавий-маърифий манбаларга асосланган Ўзбекистон ҳукуматининг бугунги кунда олиб бораётган миллий сиёсатининг негизини ташкил этади.
Мамлакатимизда миллатчилик, шовинизм сингари ёвуз ва бузғунчи ғояларнинг кучайишидан, сақланиб қолишидан манфаатдор бўлган ижтимоий гуруҳлар, миллат ва элатлар мавжуд эмас. Бироқ мазкур иллатларнинг ўзи сақланиб қолмоқда2.
Бугунги кунда Ўзбекистонда миллатлараро муносабатларни мустаҳкамлаш, ижтимоий-сиёсий барқарорликни таъминлаш йўлида мамлакатимиз томонидан олиб борилаётган ишлар республикамиздаги вазиятгагина боғлиқ эмас. Зотан, Марказий Осиё минтақасидаги миллатлараро тотувлик айни вақтда қўшни мамлакатлар сиёсатига ҳам боғлиқдир. Ўзбекистон ҳукуматининг бу борада олиб бораётган сиёсати, миллатлараро муносабатларни барқарорлаштириш йўлидаги ҳаракатлари диққатга сазовордир. Мамлакатимиз раҳбарияти мазкур вазифаларни бажаришда турли усул ва йўллардан моҳирлик билан фойдаланмоқда. Айниқса давлат раҳбарларининг туб аҳолилар билан ўзаро учрашувлари, иқтисодий, сиёсий, маданий, маърифий соҳалардаги ҳамкорлик, минтақа давлатлари ички ишларига аралашмаслик, ўзаро ишонч, бир-бирларини ҳурмат қилиш ва шу кабиларнинг барчаси келажакда Марказий Осиё минтақасида ўзаро яқинлик, барқарорлик ва миллатлараро тотувликни таъминлаш учун кенг имкониятлар яратиб беради.
Миллатлараро муносабатларни юксалтириш йўлидаги қўлга киритилаётган ютуқларни янада мустаҳкамлашда жамиятимиз ҳаётида қонун устуворлигини таъминлаб беришнинг ҳам аҳамияти беҳад каттадир. Ўтмишда аждодларимизнинг энг ажойиб фазилатларидан бири одамларни тили, турмуш тарзига қараб ажратмаганлигидир. Аждодларимиз асрлар мобайнида жамиятнинг барча аъзоларига бир хил муносабат билан қараб келганлар. Аждодларимизнинг мана шундай ўлмас фазилатлари бугунги кунда авлодлар томонидан амалий ривожлантирилиб келинмоқда. Кўп миллатли мамлакатимизда турли хил миллатлар ва халқлар ўртасида тотувлик, ҳамжиҳатликни сақлаб қолишга, Ўзбекистон барча фуқароларининг тенг ҳуқуқлилигини таъминлаб боришда ҳамда улар билан боғлиқ бўлган муаммоларни ҳал этишда қонунчилик нормаларига амал қилиб келинмоқда.
Демократик тамойиллар асосида ишлаб чиқилган, инсон манфаатлари ва ҳуқуқларини ҳимоя қилишни ўзининг асосий мақсади қилиб қўйган амалдаги Конститутциямизнинг 8-моддасида: «Ўзбекистон халқини, миллатидан қатъий назар, Ўзбекистон Республикасининг фуқаролари ташкил этади» — деб таъкидланган. Конситуциянинг 4-моддасида эса «Ўзбекистон Республикаси ўз ҳудудида истиқомат қилувчи барча миллат ва элатларнинг тиллари, урф-одатлари ва анъаналари ҳурмат қилинишини таъминлайди, уларниннг ривожланиши учун шундай шарит яратади»1, - деб қайд этилган. Умуман, миллатлараро муносабатларни таъминлаб, такомиллаштириб бориш бугунги замон талаби бўлиб, Кониституциямизда ўз ифодасини топган.
Турли миллат вакилларидан иборат Ўзбекистон “Оила ва жамиятнинг ўзаро ижтимоий-сиёсий ва маънавий муносабатлари” мавзусида кўрик танловлар ўтказиш мақсадга мувофиқ.
Оила масаласи демографик сиёсатнинг марказий масалаларидан бири саналади. БМТ маълумотига кўра, 2000 йилга келиб, ер юзида 6 миллиарддан ошиқроқ одам яшамоқда. Ер юзида йилига 80 млн. га яқин чақалоқ дунёга келмоқда. Мустақил Ўзбекистонда 136 тадан ортиқ миллат вакили яшар экан, ушбу миллат вакилларининг ўзига хос урф-одатлари ва қадриятлари мавжуд.
Барча миллат вакиллари билан ҳамкорликда “Наврўз – умумхалқ байрами” мавзусидаги байрамни турли миллат вакиллари ўртасида ўтказиш ўқув-талабаларимизни ушбу тадбирларда иштирокини таъминлаш муҳим аҳамият касб этади.
Ўқувчи-талабаларнинг танлаган касбларига қизиқишларини кучайтиришга, миллий таълим – тарбия асосларини тиклаш ва ундан фойдаланишга қаратилган ҳамда устоз, мураббийликнинг моҳияти яна ҳам янгича маъно билан бойиётганлигини таранннум этишга бағишланган «Танлаган касбимиз – бизнинг фахримиз» номли кўрик – танлов ташкил қилиш мумкин. Бу танловда ҳам профессор – ўқитувчилар ва талабалар миллий-нисбий томонларини, Шўро даври болалар боқчалари, мактаблари ва олий ўқув юртларидаги ижобий ва салбий ҳолатларни ҳамда бугунги кунимиз таълим – тарбиясидаги ютуқлар ва муаммоларни саҳна кўринишлари орқали ифода этдилар.
Айниқса, талабалар томонидан танланиб, намойиш этилган таълим – тарбиядаги салбий ҳолатлар, кўриниш якунида бу муаммолар ечимининг берилиши, ижрочиларнинг муаммоларини бартараф эта олиш қобилияти ва истаги кучлилиги, ўзлари бундай муаммолар учрашини билган ҳолда бу касбни севиб танлаганликларини кўрсатиб беришлари тавсия этилади. Ушбу кўрик танловда турли миллат вакиллари ўз қизиқишларини инобатга олган ҳолда кўрик танловни ўтказиш мумкин.
Шунингдек, мустақил Ватанимизни улуғлаш, ёшларни эса мана шундай келажаги буюк Ватанга чексиз садоқат, муҳаббат руҳида тарбиялашга қаратилган «Она юртим – олтин бешигим» мавзуида кўрик – танлов ўтказишда турли миллат вакилларининг иштирокини таъминлаш муҳим аҳамият касб этади.
Ўзбекистон Республикаси ўз ҳудудида истиқомат қилувчи барча миллат ва элатларнинг тиллари, урф-одатлари ва анъаналарининг ҳурмат қилинишини таъминлайди, уларнинг ривожланиши учун шароит яратади1. Конституциямизда белгилаб қўйилган ушбу қоида ҳам ҳаётда ўзининг амалий ифодасини топмоқда. Республикамизда миллий-маданий эҳтиёжларни қондиришнинг муҳим механизмига айланган 150 та миллий-маданий марказ фаолият кўрсатаётгани фикримизнинг яққол далилидир.
Мустақиллик йилларида мамлакатимиз раҳбарияти миллий масалани оқилона, халқаро тамойилларга мос йўллар билан ҳал этиб, миллатлараро муносабатларни янада уйғунлаштириш чора-тадбирларини кўриб келмоқда. Миллатлараро муносабатлар борасида амалга оширилаётган ишлар Ўзбекистон ривожида қўлга киритилган энг катта ютуқлардан биридир.
/>
1 Туленов Ж., Ғофуров З. Миллатларо ҳамжиҳатлик давлатимиз бойлиги. – Т., Ўзбекистон, 1999, 13-бет.
2 Отамуратов С., Отамуратов С. Ўзбекистонда маънавий-руҳий тикланиш. – Т., Янги аср авлоди, 2003, 127-бет.
1 Ўзбекистон Республикаси Конституцияси. – Т.: Ўзбекистон, 2010. – 4-5-б.
1 Ўзбекистон Республикаси Конституцияси. – Т., Ўзбекистон, 2010.
Машарипова Г.К. – ТТЕСИ доценти, т.ф.н.